A Consellería de Medio Ambiente negou onte que a chamada fosa atlántica, situada a unhas 300 millas das costas galegas, teña algún tipo de «incidencia radiolóxica» que poida pór en perigo a saúde humana. O director xeral de Calidade e Avaliación Ambiental, Joaquín Buergo, respondeu onte no Parlamento a unha pregunta do BNG, na que se alertaba sobre o deficiente control desta zona marítima, remarcando que se fixeron en todo momento «controis rutineiros» sen que se rexistrasen por agora anomalías.

Buergo explicou que o Consello Superior de Enerxía Nuclear é o órgano competente do Estado para a realización deste tipo de controis, aínda que a Xunta dispón dunha «encomenda» para tomar mostras continuas e facer un seguimento das análises. Neste sentido, asegurou que os galegos «poden estar plenamente tranquilos» polo seguimento que se realiza deste cemiterio e as súas posibles incidencias.

Os primeiros bidóns con material radioactivo empezaron a depositarse na fosa atlántica fai un cuarto de século e agora calcúlase que os residuos acumulados roldan as 140.000 toneladas. Buergo admitiu onte, como denunciou o deputado nacionalista Bieito Lobeira, que non se fixo unha «inspección visual» da zona en cuestión para comprobar a corrosión dos bidóns debido á complexidade da operación, xa que están depositados a máis de 3.000 metros de profundidade.

Tamén cualificou de «erro histórico» que se crease alí a fosa, aínda que desde o ano 1993 non se volveron a realizar novas verteduras

O deputado do BNG Bieito Lobeira reclamou onte á Administración central que deixe de practicar a «táctica dá avestruz» e asuma as súas «responsabilidades» coa fosa atlántica para comprobar «sen escusas de carácter económico» se existe algún tipo de risco ou de grao de corrosión nos bidóns con material radioactivo sepultados a máis de 3.000 metros de profundidade.

A iniciativa de Lobeira sobre o cemiterio nuclear súmase a outra que fora presentada fai un ano na Cámara galega, na que se alertaba do exposta que está Galicia a sufrir algún tipo de incidente debido á elevada cantidade de buques con material radioactivo que asucan a costas da comunidade.

A propia Consellería de Pesca informou entón de que uns dez buques con material radioactivo cruzan cada mes polo dispositivo de separación do tráfico (DST) de Fisterra, flota sobre a cal o BNG pediu que se faga un control rigoroso.