A depuradora de Cangas tamén produce contaminación atmosférica, ademais de verter augas sen desinfectar á ría. O ruído xerado polos motores da planta supera, polo menos en tres das seis medicións realizadas o 26 de xuño, o máximo de decibeis que permite a lei.

A empresa que efectuou o traballo, Virocem, detectou dous puntos nos que se alcanzan os 55,6 e 55,8 decibeis, o que constitúe unha falta leve; e un terceiro no que se recollen 65 decibeis, o que leva unha falta grave.

Virocem propón ao Concello que inste á adxudicataria, Acciona Augas, a realizar as correspondentes medidas correctoras. A empresa instalou meses atrás unhas carcasas para cubrir os motores, pero as medicións mostran que non é suficiente. Noutros tres puntos, as medicións verificaron que o ruído, aínda que próximo ao límite legal (53,2, 50,7 e 50,2) está dentro dos parámetros legais.

O PP cangués, pola súa banda, cualifica de «auténtica vergoña» que o goberno local non hai resolto aínda o problema económico que impide que entre en servizo o sistema terciario de desinfección, instalado en xaneiro deste ano. A alcaldesa asegurou o martes que este mesmo mes estaría operativo.

O PP tamén denuncia a existencia de verteduras sen depurar ao mar, cun nivel de coliformes de 28 millóns de unidades formadoras de colonias (ufc) por cen mililitros, cando o máximo permitido é de 100. A auga depurada supera tamén este límite.

Os problemas da depuradora provocaron un enfrontamento entre a alcaldesa Clara Millán, do Bloque Nacionalista Galego, e o concelleiro de Medio Ambiente, o socialista Tomás Abalde.