O valor da pesca descargada en Vigo durante o ano 2007 acariñou a barreira dos 1.500 millóns de euros. Foron en total 732.951 toneladas de especies, frescas, conxeladas e salgadas, cun descenso do 6,7% respecto ao ano 2006, pero que consolidan a Vigo como o primeiro porto pesqueiro do mundo en tráfico de peixe para consumo humano, segundo datos da propia Autoridade Portuaria reflectidos na súa memoria de actividades do ano pasado. Estes datos distancian á cidade do seu segundo competidor neste ranking, que é o porto da Coruña, que suma só a terceira parte do volume fresco do rexistrado en Vigo (con 89.718 toneladas de fresco é líder destacado en España), mentres que no caso do conxelado non existen datos publicados pola institución portuaria correspondente.

Precisamente, ao porto de Vigo chega pesca conxelada por dous medios de transporte: nos grandes buques pesqueiros conxeladores que faenan nos caladoiros arxentino, namibio, de illas Malvinas ou de Svalbard ou Groenlandia, por pór tres exemplos coñecidos, e que durante o exercicio pasado descargaron nos peiraos da cidade ao redor de 89.000, ademais de en buques mercantes, frigopríficos e en colectores especiais -en torno 1 8.000 unidades- cunhas descargas conxuntas que se elevaron a 548.798 toneladas. O valor de ambos os volumes, respectivamente, é 158 millóns de euros no caso dos buques conxeladores que arriban ao porto con diferentes tipos de especies, e duns mil millóns de euros máis por medio das descargas das naves frigoríficas ou dos colectores.

Capturas comerciais

Por flotas e caladoiros, a terceira que máis ingresos representa anualmente para O Berbés é a de Gran Sol, cunha facturación o ano pasado que se aproximou aos 80 millóns de euros, cunhas capturas conxuntas de algo máis de 23.000 toneladas. O valor das súas capturas, fundamentalmente a pescada e o galo, que alcanzan bos prezos medios nas cotizacións na lonxa e polo sistema de autocontrol dos alixos, aseguraron a rendibilidade deste caladoiro comunitario. En terceiro lugar, sempre segundo os datos da memoria da Autoridade Portuaria, figuran os alixos da flota palangreira, cun valor de máis de 35 millóns de euros e unhas capturas de algo máis de 11 millóns de quilos.

Pesca litoral

Por familias de produtos, destaca excesivamente as vendas dos mexillóns procedentes da produción das máis de medio milleiro de bateas de mexillóns que están fondeadas na ría. En conxunto, a súa produción póxase por un valor de 42 millóns de euros, e o seu cultivo elévase a 38 millóns de quilos anuais. O valor patrimonial destes artefactos flotantes pode elevarse ata uns 25.000 millóns das antigas pesetas. O total da produción vendeuse a un prezo medio de 1,1 euros o quilo. Curiosamente, a flota artesanal, que faena no interior das rías, alcanza unha cifra de negocio conxunta de 12,7 millóns de euros, e con 1.831 toneladas globais. Neste segmento, o prezo elévase a case 7 euros o quilo. é, ademais, o máis alto de todos os segmentos de fllotas que descargan e venden as súas capturas en Vigo. Toda a pesca de litoral factura case 27,5 millóns de euros.