A Xunta en funcións adxudica o carril bici que o PP quería abortar

O proxecto da conselleira Caride, que tivo un forte rexeitamento veciñal, prevé unha fase para unir Vigo e A Ramallosa e outra de Baiona á Guarda

A Consellería de Política Territorial pechou os contratos definitivos por 21 millóns logo das eleccións

Tres empresas construirán o carril bici entre Vigo, A Ramallosa e A Guarda. A Xunta en funcións acaba de asinar a adxudicación definitiva das obras. O PSOE, que dirixe a Consellería de Política Territorial, fíxoo a propósito de que as urnas o desbancaron do Goberno e coñecendo que o PP rexeitaba o proxecto. E todo sen publicidade.

Arrincaba marzo e Alberto Núñez Feijoo acababa de gañar as eleccións. O día 5, o PP de Vigo daba por feito publicamente que o novo presidente galego paralizaría o carril bici e a senda peonil ata A Ramallosa. Non en balde, en novembro o partido conservador tachara o proxecto de «disparate» ante o Parlamento galego, e pedía a súa anulación.

A Consellería de Política Territorial de María José Caride non dixo nada o 5 de marzo nin despois. Pero apenas uns días antes, o 26 de febreiro, xa pechara a adxudicación do primeiro tramo de 8,6 quilómetros, en territorio de Vigo. Así o ratifica nos documentos oficiais a firma do secretario xeral da consellería, Luis Vázquez.

A adxudicación definitiva pechouse o 18 de marzo, segundo recolleu esta mesma semana o Diario Oficial da Unión Europea ( DOUE ). Os trámites para contratar a obra iniciáronse en setembro, pero foi un Goberno en funcións o que formalizou o contrato definitivo coa unión de empresas de Movex Viaria e Construcións Manuel Pérez Portela, por 7 millóns.

Ese tramo enlaza con outro de 7,1 quilómetros, en Nigrán, ata unir Vigo e A Ramallosa, o polémico trazado. A consellería asinou a adxudicación de de ese treito por 7,9 millóns o 13 de marzo, tamén en funcións. O treito que non xerou oposición é Baiona-A Guarda, que se pechou o 18 de marzo e custará 6,5 millóns. A Xunta aínda non deu a coñecer a través do Diario Oficial de Galicia ( DOG ) estes dous contratos.

O proxecto contaba co beneplácito de ecoloxistas e de ciclistas. Pero provocou unha dura oposición dos afectados polas expropiacións, que aínda non se executaron. Argumentaban que o carril ía provocar «máis mortes», como aínda se le nos carteis que flanquean a mal chamada Autovía , a PO-325.