Os concellos da comarca do Val Miñor recibirán máis de sete millóns e medio de euros do Estado destinadas a paliar os efectos da crise económica. Esta inxección económica permitirá xerar ao redor de 300 novos postos de traballo nas diferentes obras públicas que van levar a cabo.

As cantidades foron asignadas en función da poboación e así, o Concello de Nigrán será o máis beneficiado cun achegue de 3,1 millóns de euros. Gondomar percibirá un total de 2.366.513 euros, mentres que a Baiona correspóndenlle outros 2.095.365 euros.

Os gobernos locais atópanse na actualidade na fase de selección dos proxectos que se pensan executar.

A maior parte serán actuacións de dotación de servizos básicos, para as que se empregará man de obra local. Os municipios teñen de prazo ata o 24 de xaneiro para presentar os proxectos para que poidan estar contratados no mes de abril co fin de que a execución das obras póidase levar a cabo non máis tarde do primeiro trimestre do ano 2010, aínda que é posible solicitar unha prórroga.

Esta achega de fondos vai marcar o debate político ao longo das próximas semanas. Algúns partidos políticos xa comezaron a presentar iniciativas co fin de acordar o máis posible o xeito de utilizar estes recursos.

O grupo socialista de Baiona presentou unha moción propondo a creación dunha comisión extraordinaria formada por un representantes do goberno local e un de cada un dos grupos políticos para preparar os proxectos. Rafael Lores Rosal propón, ademais, que faga despois un seguimento das actuacións asignadas.

Tamén o portavoz de UCN, Antonio Fernández Comesaña, solicitou que os fondos se xestionen en Nigrán co consenso de todos os partidos da corporación.