O ex alcalde de Gondomar, Carlos Silva, asegurouse de seguir contando cos informes favorables dos técnicos municipais para conceder licenzas grazas a unha comunicación interna que asinou en xullo do ano 2005 na que lles manifestaba que o PXOM do 97 continuaba vixente.

A nota acalaba as dúbidas do departamento de Urbanismo despois de que o PXOM quedase anulado mediante unha sentenza firme. O goberno municipal cometeu ademais unha irregularidade ao non incorporar aquela comunicación oficial ao expediente da achaiadura, segundo a representante do Ministerio Fiscal.

O antigo rexedor do PP tamén intentou manipular á actual secretaria xeral logo de ocultarlle durante dous meses do auto xudicial do 21 de novembro de 2005 que sepultaba definitivamente a achaiadura e que o goberno municipal coñecía porque o recorreu días despois. á técnico de administración xeral suxeríronlle en febreiro de 2006 que continuase informando conforme ao Plan do 97, pero non se atreveron a dicirllo á secretaria.

O que fixo Carlos Silva foi enfrontar a esta funcionaria cos avogados externos que contratara para que lle desen a razón, no seu empeño por seguir aplicando o Plan Xeral do 97.

«Durante moitos meses houbo bastantes reunións nas que eu reiteraba o meu informe e eles intentaban dicirme que a anulación do PXOM non era firme ata que non se resolvese o recurso de casación», manifestou onte Nuria Lobato na última sesión do xuízo que se segue contra Carlos Silva e as cinco persoas que compuñan o seu equipo de goberno por un presunto delito de prevaricación urbanística continuada.

Censura

Outra irregularidade cometida polo anterior goberno municipal foi a censura que impuxo aos técnicos máis importantes do Concello dos seus fracasos xudiciais para salvar o PXOM. Todas as resolucións chegaban directamente ao alcalde, sen pasar polo rexistro municipal e sen ter coñecemento a secretaria. «Tiven que porme en contacto cos avogados para pedirlles que tamén mas remitisen a min», declarou onte Nuria Lobato ante o xuíz.

A Fiscal mantivo onte a súa petición de ano e medio de prisión e dez de inhabilitación para os acusados. Nas súas conclusións finais, afirmou que cometeron un delito continuado de prevaricación desde que a Xunta comunicoulles que non podían reformar o PXOM e «de xeito impepinable» desde que chegou o auto xudicial que anulaba o pleno o 21 de novembro de 2005, porque sabían o que tiñan que facer e non o fixeron porque estaban «teimudos» co plan do 97.

Non convenceu ao Ministerio Público as declaracións cheas de «vaguedades irracionais e sorprendentes» realizadas polos acusados e non se cre que non fosen conscientes da envergardura da denuncia. Pola súa banda, o avogado da defensa solicitou a absolución dos acusados, por entender que sempre actuaron conforme a informes técnicos favorables. Por outra banda, afirmou que non está demostrado que Carlos Silva tivese un coñecemento inmediato do auto xudicial que anulaba o acordo plenario do mes de maio de 2005. O xuízo quedou onte visto para sentenza.

A trama da suposta corrupción urbanística de Gondomar ten un nome e apelidos na cúspide que se librou do banco dos acusados. é Alejandro Gómez, o anterior edil de Urbanismo, que, sorprendentemente, non formaba parte da xunta de goberno. «Manobrou hábilmente para quedar fose mentres manexaba os fíos na sombra», dixo onte a Fiscal.