O titular do xulgado de Contencioso Administrativo número un de Vigo tramita unha demanda que pide o peche da planta depuradora do Lagares, unha medida que implicaría tamén a imposibilidade de construír na mesma zona unha estación máis moderna. A demanda foi presentada o pasado ano e atópase xa en fase avanzada; de feito, o pasado martes celebrouse a proba testifical e se o resto do proceso mantén o mesmo ritmo o fallo podería coñecerse ao longo da próxima primavera.

A denuncia dos veciños baséase principalmente en dous feitos: que a depuradora carece de licenza de apertura e que incumpre o regulamento de actividades molestas, que fixa para este tipo de instalacións unha distancia das vivendas de polo menos 2.000 metros. Obviamente, os afectados pola planta intentan demostrar no xulgado que a planta afecta gravemente ás súas vidas, para o que testificou tamén o martes Luis Alfonso Rodríguez, profesor de Microbiología da Facultade de Ciencias do campus de Ourense.

Paralelamente, os denunciantes queren deixar claro que actualmente as depuradoras xa non se constrúen nas cidades nin tampouco xunto a canles de auga, sendo a localización máis adecuada os polígonos industriais.

O testemuño dos veciños e deste experto foron os únicos que puido escoitar o xuíz xa que tanto o Concello como Aqualia, contra os que se dirixe a denuncia, limítanse na defensa da instalación a presentar documentación escrita.

A depuradora do Lagares entrou en servizo a mediados de 1997 e un ano despois a Xunta transferiu a súa xestión ao Concello, que á súa vez contratou a explotación con Aqualia, empresa encargada do abastecemento de auga e o saneamento de Vigo. Desde entón os problemas foron constantes, debido principalmente aos cheiros que xera na zona. As obras de mellora e a súa ampliación minoraron dalgunha forma as consecuencias, aínda que nin moito menos na súa totalidade.

Por parte do Concello adúcese que a instalación é supramunicipal e foi construída pola Xunta, polo que non precisa licenza. Tamén xustifica a súa localización a escasa distancia das vivendas. Con todo, fai poucos meses confirmouse a ilegalidade da depuradora de Ourense e ordenouse o seu peche.