RECORTES DE PRENSA

Brest, 27 de xuño de 2008.- Galicia será a sede este ano da reunión do Comité Europeo “MASH”, integrada por expertos en áreas mariñas protexidas, especies e hábitats, dependente do Comité de Biodiversidade do Convenio para a Protección do Medio Ambiente Mariño do Atlántico Nordeste (OSPAR). Este foi un dos acordos acadados na reunión da Comisión Ospar que hoxe se celebrou en Brest, e na que participaron o director xeral de Conservación da Natureza, Xosé Benito Reza, e o director do Parque das Illas Atlánticas, Xosé Antonio Fernández.

A Comisión Ospar aceptou a proposta do representante da Consellería de Medio Ambiente, Xosé Benito Reza, para a celebración desta reunión de traballo en Galicia no vindeiro mes de outubro. A elección da comunidade galega como sede do MASH ven derivada da integración do Parque das Illas Atlánticas á Rede Ospar de Áreas Mariñas Protexidas, que hoxe se formalizou en Brest, e que supón que o conxunto das Illas Atlánticas pase a ser a primeira Área Mariña Protexida de España con carácter internacional, ao incorporarse a esta rede europea.

O encontro, que terá lugar entre o 21 e o 24 de outubro en Baiona, suporá que Galicia acolla a preto dun cento de expertos para debater, traballar e adoptar acordos relacionados co hábitat e a biodiversidade. De feito, a proposta que hoxe presentou o director xeral de Conservación da Natureza,

Xosé Benito Reza, recibiu o beneplácito unánime dos máis de 60 expertos reunidos na Comisión Ospar en Brest, que representan aos países integrados no Convenio Ospar.

Rede Ospar

A Rede Ospar foi creada no marco do Convenio de Protección de Medio Ambiente Mariño do Atlántico do Nordeste (OSPAR). A comisión Ospar, órgano decisorio do convenio, acordou a proposta da inclusión das Illas Atlánticas a esta rede europea, sendo a primeira e única candidatura presentada por España. Xunto ás Illas Atlánticas incorporáronse hoxe á rede europea as áreas mariñas de outros países como Dinamarca, Francia, Portugal, Suecia, Alemaña, Noruega e Reino Unido, que suman en total 38.178 quilómetros cadrados de novo territorio protexido internacional na Rede Ospar.

O Convenio Ospar é o primeiro referente á nivel mundial para a protección do medio mariño. De feito, os documentos de traballo que emite periodicamente, a definición de estratexias e o desenvolvemento de plans e programas para a loita contra a contaminación e a defensa do patrimonio natural dos océanos son referentes de primeiro orde para a Comisión Europea así como para outros países fora da Unión, á hora de definir, a nivel de gobernos, as políticas de protección do medio mariño.

Convenio Ospar

A Rede Ospar desenvolvese no marco do convenio do mesmo nome, relativo á protección do medio ambiente mariño do atlántico do nordeste, subscrito en París en 1992. Dende a súa entrada en vigor o convenio o seu articulado é de obrigado cumprimento para as partes contratantes, que son Bélxica, Dinamarca, Finlandia, Francia, Alemaña, Irlanda, Islandia, Luxemburgo, Países Baixos, Noruega, Portugal, España, Suecia, Suíza, Reino Unido e a Comunidade Europea.

O traballo realizase por medio dos comités, que abarcan as áreas de sustancias perigosas, sustancias radioactivas, industria do gas e petróleo en mar aberto, eutrofización, biodiversidade e vixilancia e avaliación. A súa vez, varios grupos de traballo dependen destes comités, como o MASH, encargado da implementación da estratexia da biodiversidade, no que se inclúen especies e hábitats mariños.