4.- BOUZAS: Ampliación do recheo
A principios do século XX, Bouzas era un dos portos pesqueiros máis importante da ría, e foi Concello ata o ano 1904, cando foi absorbido polo de Vigo.
Desde os primeiros anos 60 comezouse a construír alí un recheo que nunca parou de medrar. É o maior e o máis agresivo dos perpetrados na nosa ría, e representa un claro exemplo de utilización de terreos, teoricamente portuarios, para usos ben diferentes.
Na foto pódese observar o enorme espazo ocupado polo depósito de coches de Citroën. Para que esta empresa tivera unha infraestructura portuaria adecuada para o embarque dos vehículos, abondaría coa cuarta parte. O resto é almacenaxe, e non debería ocupar terreos portuarios. As naves de negros teitos corresponden á sede e ás oficinas da Zona Franca de Vigo: ¡¡oficinas!!
Aínda que se prevé que estas instalacións da Zona Franca (80.000 m2) abandonen esa ubicación, (o que sumado a outros espazos recuperados deixaría libres 230.000 m2) queren ampliar o monstro para facer unha nova terminal de contenedores.
Esta nova ampliación, sinalada en encarnado, suporía unha superficie de 80.500 m2, para o que serían necesarios 840.000 m3 de cascallos. Tamén se prevé o dragado de 630.000 m3 para acadar un calado de 20 metros, e levaría aparellado un espigón de 100 metros de longo. A pesar da insistente publicidade oficial, só unha parte da ampliación iría sobre pivotes.
O impacto desta obra sobre as correntes, estreitando unha zona crítica, retardaría sensiblemente a renovación das augas da Ría. Algo que hai que sumar ós danos que todo recheo e todo dragado producen ós ecosistemas mariños.
Unha ampliación que ademais podería levarnos a ver, dentro de non moito tempo, petroleiros atracados en Bouzas, pois o proxecto de oleoducto ata o porto seco de Salvaterra, ameaza tamén a este lugar.
O plan contempla ademais a construcción dunha macro depuradora (ver o punto 3 do mapa) e unha praia artificial: toneladas de area verquidas á ría regularmente, na cara oeste do recheo. E toneladas de sarcasmo, despois de destruír as praias naturais.
O colectivo Bouzas Móvete ten convocado numerosas mobilizacións, con gran participación veciñal, contra este proxecto. O pasado 28 de setembro entregou no Rexistro Xeral do Concello 4.635 firmas de cidadáns e cidadás como mostra de rexeitamento á construción dunha depuradora e á ampliación dos aterramentos na zona de Bouzas. |
|
|
